म सुतुवा मन्त्री होइन है : राष्ट्रियसभामा निदाएको तस्वीर राख्दै महावीर पुन
काठमाडौँ : विज्ञान प्रविधि तथा नवप्रवर्तनमन्त्री महावीर पुनले राष्ट्रियसभामा निदाएको तस्वीर फेसबुकमा राख्दै आफू सुतुवा मन्त्री नभएको स्पष्ट पारेका छन्। आज राष्ट्रियसभामा गर्मीले झपक्क निदायको स्वीकार गर्दै मन्त्री पुनले लेखेका छन्, 'म सुतुवा मन्त्री होइन है साथीहरू, हरेक दिन बिहान ६ बजे उठेर ७ बजेदेखि बेलुकी ११ बजेसम्म मन्त्रालयको अफिसमा नै काम गर्छु नि। कहिल्यै छुट्टी मनाएको छैन र मनाउँदिन।'
उनले थप लेखेका छन्, 'आज राष्ट्रियसभामा म झपक्क निदाएछु। सोसल मिडियाका भाइहरूले पैसा कमाउनका लागि हो अथवा मेरो बेइजत गर्नका लागि हो मेरो भिडियो भाइरल बनाएछन्। अनि कमेन्ट गर्नेहरूको लर्को नै लागेछ र अल्छीमन्त्री, काम नगर्ने मन्त्री आदि इत्यादी भनेर मलाई भक्कु गाली पनि गरेछन्। गाली गर्ने र भिडियो भाइरल बनाउनेहरूलाई धन्यवाद।' उनले राष्ट्रियसभा बस्ने हलमा एसी नभएकाले गर्मीका कारण आँखा झपक्क भएको कुरा आफूले नढाँटेको पनि खुलाएका छन्।
