बन्दका बाबजुद धमाधम फेसबुक चलाउँदै नागरिक, २६ मध्ये 'एक्स'मात्रै सरकारको सम्पर्कमा
काठमाडौँ : सरकारले नेपालमा दर्ता नभएका सामाजिक सञ्जाललाई सञ्चालनमा रोक लगाएपछि १ कम्पनीका प्रतिनिधि मात्रै सम्पर्कमा आएका छन्। सरकारले बन्द गरेका २६ मध्ये एक्स मात्रै सरकारको सम्पर्कमा आएको सञ्चार तथा सूचना प्रविधि मन्त्रालयका प्रवक्ता गजेन्द्रकुमार ठाकुरले थाहाखबरलाई जानकारी दिए।
नेपालमा सर्वाधिक प्रयोग हुने एपले नै नेपालमा दर्ता हुन अनिच्छा देखाएपछि सरकारले बन्द गर्ने निर्णय लिएको हो। २०८० सालमै दर्ता हुन आग्रह गरेको सरकारले त्यसपछिका समयमा पटकपटक सामाजिक सञ्जाललाई दर्ता हुन सार्वजनिक आह्वान गर्दै आएको थियो।
सरकारको निर्देशनअनुसार दूरसञ्चार सेवा प्रदायक कम्पनीसँगै केही इन्टरनेट प्रदायक कम्पनीले उक्त एप बन्द गरेका छन्। बन्द हुनेमा मेटाअन्तर्गतका फेसबुक, म्यासेन्जर, इन्स्टाग्राम, ह्वाट्सएप र थ्रेड छन् भने अन्यमा युट्युब, ट्विटर, लिंक्डइन, स्न्याप च्याट, रेडिट, डिस्कर्ड, पिन्ट्रेस्ट, सिग्नल, विच्याटलगायत २६ एप छन्।
सरकारले दर्ता नभएका सामाजिक सञ्जालले कानुनी प्रक्रिया पूरा गरे प्रतिबन्ध फुकुवा गर्ने जनाएको छ। दूरसञ्चार प्राधिकरणका प्रवक्ता मीनबहादुर अर्यालले सामाजिक सञ्जाल सधैँका लागि बन्द भयो भन्ने हल्लाको पछि नलाग्न आग्रह गरे।
तर कसरी धमाधम चलिरहेको छ फेसबुक?
सरकारले बन्द गरे पनि अहिले फेसबुक धमाधम चलिरहेको छ। मिडियाहरूले फेसबुकमा कन्टेन्ट राखिरहेका छन् भने सर्वसाधारण नागरिकले पनि फेसबुक प्रयोग गरिरहेका छन्। सुरुमा केही घण्टा असर गरे पनि अहिले प्रयोग बढ्दो छ।
म्यासेन्जर पनि चलिरहेकै छ एक्स निर्वाधरुपमा चलिरहेको छ। फेसबुक चलाउन धेरैले भिपीएनको प्रयोग गरेका पाइएको छ भने ब्राउजरको सेटिङ परिवर्तन गरेर तथा डिएनएस एक्टिभ गरेर पनि प्रयोग गरिरहेका पाइएको छ। कतिपयले आफैँ चलिरहेकाे प्रयोगकर्ताले प्रतिक्रिया दिइरहेका छन्। जीमेल पनि चलिरहेका छन् कसरी प्रयोग गर्ने भनेर फेसबुकमार्फत नै जानकारीमूलक भिडियोहरू पोष्ट भइरहेको छ।
